Dyma'r bumed blaned oddi wrth yr Haul.
Iau yw'r blaned fwyaf yng nghysawd yr Haul (mae ei diamedr ar y cyhydedd tua 88,846 o filltiroedd). Mae màs Iau tua 2.5 gwaith yn fwy na màs yr holl blanedau eraill yng nghysawd yr Haul gyda'i gilydd.
Gelwir y blaned yn gawr nwy oherwydd iddi gael ei ffurfio'n bennaf o nwyon hydrogen a heliwm. Nid ydym yn gwybod ai nwyon yn unig sydd ynddi ynteu a oes craidd solet i'r blaned.
Mae'r cymylau o gwmpas Iau wedi'u ffurfio o grisialau amonia.
Dyma'r blaned fwyaf yng nghysawd yr Haul a hithau hefyd yw'r blaned sy'n troelli gyflymaf. 10 awr yn unig y mae un cylchdro ar ei hechelin yn ei gymryd (un diwrnod Iau). Er hynny, mae'n cymryd 12 blwyddyn Daear i gwblhau un orbit o'r Haul.
Oherwydd maint a chyflymdra troelli'r blaned, mae'n cynhyrchu maes magnetig sydd 14 gwaith yn fwy pwerus na'r Ddaear.
Mae gan Iau 79 o leuadau y gwyddom amdanyn nhw. Enwau'r pedair fwyaf yw Ganymede, Io, Ewropa a Calisto. Ganymede yw'r lleuad fwyaf yng nghysawd yr Haul (ychydig yn fwy na Mercher). Gan fod y pedair lleuad hyn mor fawr, gallwch eu gweld trwy finocwlar yn unig ar noson glir.
Mae saith o'n llongau gofod wedi ymweld â'r blaned Iau.
Y daith lwyddiannus gyntaf i Iau oedd taith heibio iddi yn 1973 gan Pioneer 10 (chwiliedydd gofod NASA, sef y cyntaf i adael cysawd yr Haul). Ers hynny, teithiwyd heibio iddi bedair gwaith ar y ffordd i blanedau eraill.
Galileo oedd y llong ofod gyntaf i fynd i mewn i orbit Iau yn 1995. Arhosodd yno tan 2003. Yn ystod y cyfnod hwn, fe wnaeth ddarganfod data ar bedair prif leuad Iau a ddangosai fod dŵr yn bodoli o dan arwynebau tair ohonynt.
Mae chwiliedydd NASA o'r enw Juno mewn orbit o amgylch Iau ar hyn o bryd. Cyrhaeddodd y chwiliedydd hwn orbit Iau yn 2016 (ar ôl teithio dros 2 filiwn o filltiroedd) a bydd yn parhau ar ei daith tan 2021. Un o amcanion casglu data'r chwiliedydd hwn yw ceisio pennu beth yw strwythur craidd y blaned.
Defnyddiwch y wybodaeth uchod i ateb y cwestiynau hyn:
Dyma ddolen fydd yn eich cysylltu â'r daflen atebion ar gyfer yr ymarfer hwn. Peidiwch â'i defnyddio tan ar ôl i chi roi cynnig ar yr holl weithgareddau